telugudanam.co.in

మనోదక్షతకు మార్గాలు

తమ శక్తి సామర్ధ్యాలను పెంపొందించుకునేందుకు క్రీడాకారులు నిరంతరం కృషి చేస్తూ ఉంటారు. శారీరకంగా ఎంతో దృఢంగా తయారవుతూ మరిన్ని ఉత్తమ ఫలితాలను సాధిస్తున్నారు. ప్రతి మనిషీ ఏ రంగంలో ఉనా మానసికంగా కూడా అటువంటి శక్తి సామర్ధ్యాలను సంపాదించుకోవచ్చు. మానసికి శక్తి సామర్ధ్యాలను విస్తృతపరుచుకుంటే సావధానత పెరుగుతుంది. దానివల్ల కష్టాలను ధైర్యంగా ఎదుర్కొనే చతురత ఏర్పడుతుంది. అంతేకాకుండా ఒక ఉన్నతిని సాధించవచ్చు. అనేకమైన లాభాలను పొందవచ్చు. అందుకు నిశ్చలమైన అభ్యాసం, ఆత్మశిక్షణ, తగిన ఉద్యమం అవసరం.

• ఉత్తమ సాహిత్యం చదవడం నేర్చుకోవాలి. ప్రసిద్ధి పొందిన కావ్యాలను పరిచయం చేసుకోవాలి. చరిత్రకు సంబంధించిన విషయాలు చదవాలి. చదివేకొద్దీ అభిలాష అదే పెరుగుతూ ఉంటుంది. చరిత్ర చదవడం వల్ల స్వభావం మారుతుంది. ఉదాత్తత వ్యాపిస్తుంది.
• అభిరుచులను పెంచుకోవాలి. మనసును క్రమశిక్షణలో పెట్టుకోడానికి కొత్త భాషాభ్యాసం బాగా లాభిస్తుంది. గణిత శాస్త్రం, శిల్పశాత్రం సంగీత శాస్త్రం అభ్యసించడం, చదరంగం ఆడటం, జర్నలిజం నేర్చుకోవడం, చిన్న కథలు వ్రాయడం సహకరిస్తాయి. ప్రస్తుతం ఉన్న సమస్యలను పరిష్కరించుకోవడానికి నైపుణ్యాలు సంపాదించాలి. నూతన ప్రపంచంలో కొత్త విషయాలు ఉత్సాహం కల్గిస్తాయి.
• వీలైనంత ప్రయాణాలు చేయాలి. ప్రయాణాన్ని మొదట ప్లాను చేసుకోవాలి. వివరాలు సేకరించాలి. ప్రయాణ సమయంలో వివిధ దేశాల వారితో సంభాషణ కొనసాగించవలసి ఉంటుంది. ఇతరులను చూడడం, వారి ఆచారాలు, ప్రార్ధనలు పరిశీలించడం, వారి లోటుపాట్లను తెలుసుకోవడం, గుణగణాలను గ్రహించడం ఎంతో ఉత్తేజకరంగా ఉంటుంది. దీనివల్ల స్వార్ధపరత్వం పోతుంది. హృదయ వైశాల్యత ఏర్పడుతుంది. మనసు సునిశితంగా తయారవుతుంది.
• శబ్ద సముదాయాన్ని సంగ్రహించాలి. సమయానుకూలంగా అతి ఖచ్చితంగా మాటలను ఉపయోగించకపోతే సరిగ్గా మాట్లాడలేము. మనకు శబ్ద సముదాయం ఉన్నకొద్దీ ఎక్కువ యోచించగలుగుతాము. మాట్లాడగలుగుతాము. వ్రాయగలుగుతాము.
• బుధిశాలుర సహవాసం చేపట్టాలి. మంచి తెలివిగల సంభాషణ వల్ల మనసు చైతన్యవంతం అవుతుంది. మంచి పత్రికలు చదువుకోవచ్చు. రేడియో, టీవీలను వివేకవంతంగా వినియోగించుకుంటే వివేకవంతులతో వ్యవహరిస్తున్నట్లే ఉంటుంది.
• సామాన్య విద్యావకాశాన్ని విస్తృతపరుచుకోవాలి. చిన్నతనంలో చదువుకుంటున్నప్పుడు విషయాన్ని సరిగ్గా గ్రహించలేకపోవచ్చు. అసలు విషయం నచ్చి ఉండకపోవచ్చు. లేదా పాఠాలు చెప్పే ఉపాధ్యాయుడు నచ్చకపోవచ్చు. పెద్దైనప్పుడు వాటిని మళ్ళీ చదువుతూంటే వాటినుంచి అత్యధిక లాభాలను పొందుతాము.
• భావాలను విశదంగా చెప్పడం నేర్చుకోవాలి. మాటలను తూచి సరిగ్గా ఉపయోగించడం అందరికీ అందుబాటులో ఉన్నది.

వ్రాతమూలకంగాగానీ, సంభాషణమూలకంగాగానీ మన భావాలను వెల్లడించడం తృప్తికరమైన అనుభూతి. దీనివల్ల యోచనాశక్తి అభివృద్ధి పొందుతుంది. చెప్పగలగడంలో నైపుణ్యం, నేర్పు అభ్యాసం వల్ల ఏర్పడుతుంది.మరో మార్గం కలం స్నేహం ఏర్పరచుకోవడం. ఒంటరిగా ఉన్నవారెవరో తెలుసుకుని అటువంటి వారితో వ్రాతమూలకంగా సంబంధం పెంచుకోవాలి. టెలిఫోన్‌లో మాట్లాడడంకంటే ఉత్తరం వ్రాయడమే ఉత్తమం. నీవు వ్రాసే ఉత్తరం నువ్వు గర్వపడేట్టుగా ఉండాలి. వార్తా పత్రికలకు జాబులు వ్రాస్తుండాలి. ఆశయాలను పెంచుకోవడానికి ఇదో మార్గం. ఈవిధంగా ప్రయత్నిస్తే పెద్ద వ్యాసాలు, చిన్న వ్యాసాలు, కథలు, నాటకాలు బ్రహ్మాండంగా వ్రాయవచ్చు.